تبریزدن قادین گونو مناسیبتینه

فرانک فرید

تبریز- 8 مارت 2007

بو ایل دونیا قادین گونو، اؤلکهده چوخلو بحرانلارلا ر یاراندیغی حالدا آغیرلانیر. آیریجا اینسانلارین هر جوره کیچیک ایستکلری بئله تاپدالانماقدادیر؛ اؤگرنجیلر، اؤگرتمنلر و ایشچیلرین صینفی ایستکلریندن توتدو، قومیتلرین و قادینلارین دوغال حاقلاری بئله دانیلیر و... . گؤردوگوز کیمی بو گونلر قادین مسألهسینه عایید بوتون مراسیمین قاباغی آلینیر. قادینلاریمیز دا اؤز ایستکلری اوچون زیندانلارا دوشمکدن بئله چکینمیرلر. داها ایندی تکجه ـ فورمالیته اولاراق ـ قادین گونون قوتلاماق یئترلی دئییلدیر. بیز آذربایجانلی قادینلار دا بوتون قادینلار کیمی داها چوخ دریندن مسألهلریمیزه یاناشمالییق. بیز بو توپلومدا یاشایان اینسانلار کیمی بوتون چتینلیکلرایله اوزبهاوز اولدوغوموز حالدا، قادین اولاراق سورونلاریمیزی دوغروـ دورست آراشدیرمالی و بو قونودا الی دولو اولمالی و اؤزوموزو چوخيؤنلو ثبوت ائتمهلییک.

وارـ دولت، گوج و قدرتدن اللری قیسیلان، ساییسی چوخ اولوب، آنجاق آزینلیق ساییلان قادینلار؛ اونلارین ایچینده دیللری و کولتورلری دانیلان بیز تورک قادینلار، دهشتلی سانترالیزمین بوراخدیغی دار ساحهلرده، توپلومون قیراغیندا چالیشانلاریق. کیملیگی هر طرفدن بودارلانان قادین، بو چتین یولدا ذره ـ ذره ، اله گتیردیکلرینین بؤیوک دگرینی آنلاییر و بو آغیر یولو سئچدیگینه فخر ائلهییر.

بیز الیمیزده اولان بوتون ایمکانلارین آزلیغینا راغما، قادین حرکاتین دیرچلدیب، آیاق اوسته ساخلاماق ایستهییریک. بواؤلکهده قادین مسألهسین، یئرلی ـ دیبلی دانانلار وار؛ اؤز جینسیتیندن آسیلی سورنلاری اونودوب، تکجه ارککلرین ایستهدیگی میدانلاردا قاباغا دوشوب، هله ده قهرمان قادین آختارانلار وار؛ دوشون قاباغا وئریب، آذربایجاندا قادین مسألهسی یئریمز دیینلر وار... . نه یازیق کی قادینلارین دالی قالماسی بوتون توپلومو آخساداجاق و بیر توپلومون قادینلارینین دورومو، دونیادا ایرلیلمه اؤلچولرینین اؤنملیسی ساییلیر؛ نه یازیق کی مدافعه اولونان آنا دیلیمیز، آنا سؤزویله باشالاییر و اونون چوخ گئنیش طرفی آنالاریمیزا باغلیدیر و اؤزونو باسقی آلتیندا حیس ائلهین قادین، اؤزون خلاص ائتمک اوچون داها چوخ الیناسیونا قاپیلاجاق؛ نه یازیق کی آیری بشر حاقلارین، بیر حاقین اوغوروندا الدن وئرمگین سونوجو، دیکتاتورلوقدان باشقا هئچ نه اولماییب، اولمایاجاق دا و سونوندا، نه یازیق کی هر حاقسیزلیق اینساندان بیر دیش قوپاردار و نهایتده بو اینسان پولوشو هئچ ایشه یاراماز! بوتون بشر حاقلاری اوغوروندا چالیشانلار بو ساده مسألهیه چاتمامیشلارسا، بیز ایلک اؤنجه اونلاری باشا سالمالییق: بو حاقلار بؤلونمهمهلی ، بونلارین هر بیری اینسانلیغین بیر پارچاسیدیر.

قادین مسألهسینین مستقیل ایرلی گئتمهسی، اؤز تجربهلریمیز و تاریخی تجربهلر اساسیندا اله گلیب. قادینلار بوتون تاریخی دؤنملرده اللریندن گلنی اسیرگهمهییب و نهایت ده اللرینه بیر شئی توخداماییبدیر. اونا گؤره کی عمومیتله کیشیلرین باشچیلیغیایله اولان حرکتلر تکیؤنلو حرکتلر اولوب؛ اونلار هر دورهده گوجلرین تکجه بیر مسألهنین اوزرینده قویوب و باشقا حاقسیزلیقلاری گؤرمزدن چالیشیب و قادینلاری دا اؤزلریله بیرلیگه چاغیریبلار. بوتون حرکتلر بیر-بیرینین دالینجا یوخ، بیر- بیرلریله برابر ایرلی گئتمهلیدیلر، قادین مسألهسی ده آیری مسألهلرین یانی-سیرا و بیرلیکده چؤزوله بیلر. بونا اینانیریق کی عدالت، یا هامیا وار یا هئچ کیمه یوخدور!