بيز باشارديق (2) "تبريزده بير تبريز وار ايميش"

 

 

 

نوت: خورداد قياملاريندان آرتيق بير ايل سووشور، کئچن ايل بؤيوک و قيمتلي تجروبه‌لر قازانديق. سؤز يوخ کي بو دؤنمين تاريخيني يازماق و باش وئرن حاديثه‌لريني آناليز ائتمک، آيدينلاريميزين اساس وظيفه‌لريندندير. آنجاق هر شئيدن اول آيري-آيري شخصي خاطيره‌لر و شخصي تجروبه‌لر قلمه آلينماليدير. همين مونوقرافيلرين اوزرينده ده چاغداش آذربايجان تاريخي يازيلا بيلر سانيرام.

اوخوياجاغينيز بو جيزما-قارالار سون قيام گونلرينده گؤروب، ائشيتديگيم و شخصا  ياشاديغيم آجيلي-شيرينلي خاطيره‌لر و تاثّراتيمدير.

بيرينجي بؤلوم ميتينگ آخشامينا عاييد ايدي.  اوخوياجاغينيز بو بؤلوم ده ايسه قيام گونوندن دانيشيليب.

عليرضا صرافي

 

2- جي بؤلوم

تبريزده بير تبريز وار ايميش

 

 

 (دوشنبه 1- خورداد)

-       ساباه ساعات اون عرفه‌سينده اويرنجيلردن خبر گلدي کي استانداري و فرمانداريه گئديب، ميتينگين پروقرامين رسما اونلارا بيلديريب و تاييدلرين آليبلار.

همان گون ساعات 1- دن 3-‍ه کيمي تبريزين آزاد اونيورسيته‌سينده اعتيراض آکسياسي کئچيريله‌جکميش. اؤيرنجيلر گؤزله‌ييرديلر گؤرسونلر، عجبا شهر ايچي ميتينگه دؤولت نئجه باخير.

-SMSلر هر طرفه ياييلدي کي: ميتينگين برنامه‌سين فرمانداريه اعلان ائديبلر، اونلار طرفيندن ده مانع‌چيليق يوخدور.

 اؤيرنجيلر ده همين خبري اونيورسيته آکسياسيندا يايديلار و هامي بيرليکده مراسيمين سونوندا راستاکوچه آغزينا گئتمگي قرارا آلديلار. بير چوخ آذربايجان ميلي حرکتي فعاللاري دا هاميليقجا جان و ديلدن ميتينگه قاتيلماق قرارينا گلديلر.

ساعات دؤرده ياخينلاشير، اورگيم دؤيونور. ايشين نبضي اليمه گلسين دئيه فرماندارين سياسي –امنيتي ايداره‌سينين صدري، آقاي صمد احمدي نژادا زنگ ائله‌ديم.

سوروشدوم: - گويا بوگون بير ميتينگ اولاجاق ائشيتديگيمه گؤره دانيشجولار سيزنن گؤروشوبلر و راضي‌ليغينيزي دا بيلديرميش‌سينيز. سيز بونا نه دئييرسينيز.

او دئدي:

-             اينتيظامي گوجلر بو ايشين قارشيسين آلاجاق!!

-             نئجه !؟ آخي بئله بير صؤحبت وار، کي سيزلري جرياندا قويوبلار و سيز ده مانع اولماميب و..

-             بعلي دوغرودور، دانيشجولاردان منيم يانيما گلديلر آنجاق . . . .

آنلاديم کي يوخاريلاردا دا چاش – باشليق وار، فرماندارينين ميتينگه ايجازه وئرمه‌سينه رغماً سونرا باشقالارينين سناريوسو ايشي دگيشيک ساليب.

ساباهيسي گون احمدي‌نژاد منه دئيه‌جکدي کي ايش بيزيم اليميزدن چيخميشدي. دئديم:

-       آقاي احمدي‌نژاد!! بيلديگيمه گؤره ميتينگه چوخ آدام گله‌جک و اگر اينتيظامي گوجلر بو اويونا قاريشسالار، آرا قاريشار، مذهب ايتر ها!!. - دئديم.

بونو ائشيتجگين ديکسينيب، بير آز ال-آياغا دوشن کيمي:

-             هر حالدا اگر اعلان ائديلن برنامه‌دن چيخماسالار و فرقلي شوعارلار تجزيه‌طلب‌ليک شوعاري! وئريلمه‌سه قاباغي آلينميياجاق.

-       هر حالدا  يئنه ده گرگ هر نؤوع توققوشمادان چکين‌سينلر، چونکو آلله ائله‌مه‌سين يارالانان، اؤلن اولار. من اؤزلوگومده اليمدن گلني ائتمگه حاضيرام. آنجاق سيز ده لوطفا الينيزدن گلني ائدين- دئديم.

بونا راضي اولدوغونو بيلديردي. آنجاق ايش اونون الينده خاريج ايدي.

***

درحال ماشينيما مينيب، شاه‌گؤلو جاده‌سيندن ائنيب، چاي قيراغي‌يله اؤزومو راستا کوچه‌نين آخيرينا يئتيرديم. ماشيني اورداجا پارک ائديب، آياقدا يورويرک ديکباشينا ساري يولا دوشدوم. يولدا گلينجه اطرافي ديقتله گؤزدن کئچيرديم. مشروطه ائوينين قاباغي و جومه‌مچيدين حيطي و بعضي کوچه‌لرين باشيندا چوخلو پوليس و اينتيظامي گوجلر دايانميشدي.

سونرالار حيدراوغلو منه آنلاداجاقدي کي: دوز ساعات دؤرتده بيزي )حسن ارک ايلن بئله) توتوب، پوليس ماشينيندا اگلشديرميشديلر. سن راستا کوچه‌ني اوز آشاغي ائنرکن پنجره‌دن سني گؤروب، اوزوموزو او طرفه دؤندرديک . سن بيزي گؤرميه‌سن ، بيردن يانيليب، بيزه ساري تانيشليق وئرمسه‌يدين ، سني ده توتارديلار.

***

ساعات دؤردو ايگيرمي دقيقه سوووشور. تخمينا مين نفر، عوموما گنج نسيل و اؤيرنجي ديکباشينا توپلانميش و قرارا آلينان شوعارلاري هايقيريرلار. بير چوخلاري دا قيراقدا دايانيب، موثبت باخيشلاريله اونلاري تاييد ائدير، آنجاق هله مئيدانا گيرمگه دابان قيزماميشدي!!.

بو آندا يهرينه جوت پوليس اوتوران اون ايکي "يگان ويژه" موتورسيکلتي، قاررا-قارريله سوروب، اوستانداري طرفيندن راستاکوچه آغزينا ساري يوگوردولر. او ايکي نفر "يگان ويژه"دن بيري موتورسکلتي سورور او بيريسي ده  باتومونو باشي اوستونده توولايير و گويا اؤز عالملرينده، آکسياچيلاري قورخودوب، صفلريني پوزماق ايسته‌ييرديلر. آنجاق فقط باتوم قاباغنيدا اولانلار قاچدي. قالانلار هامي اؤز يئرينده دوروب، يگان ويزه‌ني هووا باسديلار. اونلار دا  گؤروب توستو برکدي، او باشدان ووروب، اکيلديلر. دئمه‌لي اؤزگه‌لري قورخودا-قورخودا مئيدانا گيريب، اؤزلري قورخا-قورخا مئيداندان چيخديلار!!!

سوسري‌چيلرين تهاجومو بوندان آرتيق بير شئي اولا بيلمزدي کي.

دوغرودور صفلر بير نئچه دقيقه پوزولان کيمي اولدو. آنجاق يئنه نئچه قات بؤيويرک باغلانيب، شوعارلاريني داها اوجا سسله هايقيريب، حرکته گلديلر. گؤردوگومه اينانا بيلميرديم بير دقيقه‌نين ايچنيده نئچه مين آدام لاپ ائله بيل يئردن قاينايان کيمي مئيدانا گيرديلر.

مشروطه ائوي تماميله پوليس ايشغاليندا اولموشدو. او اوزدن جماعت بير باشا اوز قويوب، اوستاندارييا طرف گليب، باغيريرديلار: اوستاندار جاواب وئر!! اوستاندار جاواب وئر!!.

دؤولت آداملاري مشروطه ائوي يولوندا بير چوخ پوليس گوجو توپلاماقلا ميتينگي اؤز اعلان اولموش مسيريندن چيخاريب. ائله‌جه ده هئچ بير غيرعادي آشيري شوعار وئريلمه‌‌دن اول، اؤز سينانماميش حمله‌لريله ايشي عصبيته دوغرو چکديلر.

من قالميشديم احمدي‌نژادين سؤزلرينه کي دئدي اگر اعلان ائديلن برنامه‌دن چيخيلماسا و فرقلي شوعارلار وئريلمه‌سه ايشلري اولماياجاق. حال بو کي هله سوفته-بسم‌الله ايشين اوليندن يئرسيز موداخيله‌لرله، ايشي بوروشوق وضعيته آپارماغا چاليشمالاري آچيق-آشکار بلليدي. بورا قدر تک فرقلي شوعار  "اوستاندار جواب وئر" ايدي. عجبا اوستاندار جواب وئرسه‌يدي مملکت تجزيه‌مي اولاجاقميش؟

کره‌نئي‌خانا آغزيندا دايانان يگان- ويژه‌ برادرلريميز(!؟) اوزاقدان جماعتين قارالتيسين گؤروب، دالي چکيليب، گيزلنديلر، جماعت کره‌نئي‌خانا آغزينا ياخينلاشينجا يگان ويژه تو دابانا قويوب، قاچديلار.

اوستانداري قاباغيندا جماعته گؤز ياشارديجي گاز آتديلار و ايرلي گلمه‌لريني انگلله‌ديلر.  ميتينگه دعوت اولونان اوستاندار جنابلاري ايسه گيزلنيب، گؤز قاباغينا چيخميردي، اوستانداردان جاواب ايسته‌ين جماعتين جوابي  گؤز ياشارديجي اولدو، نتيجه‌ده آتيلان گاز کپسوللاريني جماعت گرتوروب، اوستانداري‌نين نئون تابلوسونو سينديرديلار.

اينسان دالغالاري، آخين-آخين، هر طرفه ياييلماقدايدي. جمعيت هر طرفدن چوخالير و اينتيظامي گوجلر تماميله قورخوب، معطل قالميشديلار. يگان‌ويژه‌نين ايلکين حمله‌سيندن اعتيبارا ميتينگين ايداره‌چيليگي تماميله اؤيرنجيلرين اليندن چيخدي. او طرفدن ده مئيدان، دؤولتين منطيقي داورانماسيني بيلن آداملاري الينده يوخ، تماميله ميليتاريست، گوجلرين الينده ايدي. بو ساعاتدان اعتيبارا قياما چئوريلن ميتينگ اؤزو، اؤزونه يول آچيردي.

ساعات بئش ‌ياريم، آلتييا قدر ساعات قاباغي، شهناز (شريعتي)، ارتش (شاهپور)، خاقاني، بازار خياوانلاريندا آلاي-آلاي يولا دوشن دسته‌لرين شاهيدي ايديم. سونرا گئديب، ماشينيمي راستا کوچه‌نين يوخاري باشيندان گؤتوروب، چاي قيراغي ايله باغيرخان کؤرپوسونه طرف يولا دوشدوم، آنجاق "تپه‌لي‌باغ"دان بئله، بوتون ماشينلار دايانيب، يول باغلانميشدي، دؤندوم کوچه‌لرين بيريله آنا يول "باغيرخان" يا "خميني" خياوانيا گلديم، خياوانين اني- بويو آداملا دولو ايدي. ماشيني اورداجا پارک ائتديم. بير آز يورويرک "خياباني مکتب"ينه طرف گلديم. بورادا حسن آذربايجان، علي خالط‌آبادي ، بابک هرگلي ‌(حسن‌آغانين اوغلو) و خليل شفيعي-يه، راست گلديم. باغيرخان کؤرپوسو (آبرسان) طرفينده گرگينليک وار ايدي، توستو گؤيه قالخميشدي. دئديلر يگان-ويژه‌لرين موتورسکلتين اودا چکيب جماعت.

بوتون دوستلار بو هيجانلي آنلار ياشاييرديلار. حسن آغا گولرک دئييردي:

-       کيشي هئچ بيز يوخودا دا گؤره بيلمزديک خلق آنا ديلي اوچون بئله بير قيام ائله‌سين. آخي بيز هله ميلتيميزه نئيله‌ميشيک کي بئله بير ائل گوجو مئيدانا گلسين! اوروج توتما، ناماز قيلما ايشين ده بئله راست گلسين!!

****

قاش قارالماقدا ايدي، باغيرخان کؤرپوسو (آبرسان) طرفيندن هاي – کوي اوجالير، گوللـه سسي گليردي بعضيلر قاچاراق اورادان اوزاقلاشيرديلار. معلوم اولدو کي دانيشگاه قاباغيندا جماعتين اوستونه آتش آچيب، نئچه نفر يارالانيب، آکسياچيلار او ساعاتا کيمي عادي نوماييش و شوعار وئرمکدن باشقا هئچ بير ايش گؤرمه‌ميشديلر. تکجه اوستانداري قاباغيندا بيز بئش‌نفر ده منيم ماشينا مينيب، اورتاليغي ترک ائتديک. بير باشا گلديک ملل- متحد خياوانيندا رنگرزي‌نين توکانينا، بو کيشي دوکتور زهتابي‌ رحمتليگين صميمي دوستلاريندان بيري ايدي. اورادا بير چاي ايچيب، اولوب، کئچن احوالاتي دانيشديق. بو آرادا بابک هانسي بير دوستونا زنگ ائله‌دي کي:

- نه خبر؟

سونرا اوزون بيزلره توتوب، دئدي:

- دئيير" بير عيدٌه دوشوب آرايا بانکلاري اود وورور، شوشه‌لرين سينديرير. "

-آخي بونلار کيمدي؟ سوروشدوق.

- دئيير: بيلينمير. . . و آرا کسيلدي.

ساعاتا باخديم، سکگيزدي، هاوا قارالميش و آرا-بير ايلديريم چاخير، ياغيش ياغيردي، هيجانلي "هاراي-هاراي من تورکم" سسلري، آلوولاري سؤندورب، سرينلدن ياغيش عطرينه قاريشاراق تاريخين کئچيدينده اوزوموزه آچيلان يئني بير پرسپکتيوي جانلانديريردي.

او بير طرفدن ده گوللـه‌لرين يايليم سسي، باروت قوخوسو و قانا بلنميش کوچه‌لر. . . . . يولدا کئچن بيريسي اؤز-اؤزونه دانيشيردي: - بو جاناوارلار راحات جان وئرمزلر کي!.

داها اوتورا بيلميرديم، دوستلاردان آييريلديم، يولا دوشدوم، بير ساعات ياغيش آلتيندا شهري گزديم و نهايت آياغيم گئدر-گئتمز ائوه دؤندوم.

او گئجه‌ني ده سحره کيمي گؤزلريمه يوخو گلمه‌دي. . . . . . . و قولاغيمدا سؤنمک بيلمه‌ين هارايلار،

 هارايلار

      و هارايلار. . . . . . .

 

قوتارمادي