الی قانلی بیر دیکتاتور گئتدی

ایچیمیزده کی دیکتاتورلارا دیققت

. اؤلوم لر ایله باشلایان بیر یاشام امریکا طرفینده ن اوتاندیرجی بیر ایسترپتیزه دونوشدورله ن اعدام ایله سونا چاتدی

صدام ین اعدام ائدیلمه سی بیر طرفده ن باشقا دیکتاتورلار اوچون دیگر طرفدن ده دیکتاتورلوق آلتیندا یاشایان میللت لراوچونده بیردرس اولمالی دیر.صدام دیکتاتورلوغو بویونجا وطنداشلارینی عرب،تورکمن،کورد اولاراق ویا سنی ،شیعی اولاراق آییراراق تام بیر ایرقچی(نژادی) یؤنتم بیچیمی قوردو. یانی عراق ین وطنداشلیق اساسینا دایالی گرچک بیر دئولت-میللت اولماسینی انگللدی

.

اصلینده صدام و اونون بعث پارتیاسی آمریکا عراقا گلمده ن اؤنجه عراقی بؤلموش و پارچالامیشدیر.دئمک ایسته دییم بو کی تجزیه اولماقدا اولان عراقین بو گونه دوشمه سینده أن بؤیوک سوچلوصدام و اونون بعث پارتیاسی ایدی. آمما دیگر طرفده ن عراق خالقی دا صدام واونون بعث پارتیاسی نین اویونونا گلدیک لری اوچون بو سوچدا اورتاق دیلار. اؤز طالع ینه یابانجی(بیگانه) قالان، اؤز طالع لرینی تعین ائده بیلمه ین بیر خالق ین بلکه ده بئله نچی آشاغیلانمایا حاققی وار دئمیه دیلیم گلمه سده، گرچک بودور.

صدام بوتون مخالیف سس لری قانلا سوسدورماغی ترجیح ائتدی.او چئوره سینده اولان اینسانلارا ساده جه اونو اؤومه لرینی،اونو تانریلاشدیرمالارینی اؤیرتدی. کیمسه نین اونو ائلئشدیرمه یه حاققی یوخویدو. او یاراتدیغی توهم ون ایچینده اؤزونو دونیانین أن عاغیللی،أن سئویلن اینسانی وامپریالیزمین أن بؤیوک دوشمانی اولاراق گؤردو.

بؤیوک دیکتاتورلارین اولدوغو توپلوملاردا بؤیوک دیکتاتورا بنزییه ن مین لرجه کیچیک دیکتاتور یارانار. حتی دیکتاتورون موخالیف لری بئله دیکتاتورلاشار. توپلومدا دیکتاتورون یاراتدیغی زوربالیق کولتورو، حاکیم سیاسال کولتور اولار. حاکیم اولان بو کولتورده اینتیقام،نیفرت،اؤلدورمک سؤزلوک لری دییالوگ،یاسا،ائمپاتی(اوزونو باشقاسی نین یئرینه قویما،باشقا اینسان لاری آنلاماغا چالیشماق) سؤزلوک لری نین یئرینی آلار.

ایران دا حاکمیت ده اولانلار و موخالیفتده اولانلارین دا صدام و اونون بعث پارتیاسیندان فرقلی دوشونمدیک لرینی سؤیله مه یمیزیانلیش اولماز. چونکو اونلاردا وطنداشلاری سویلارا ومذهب لره گؤره آیریب اونا گؤره داورانیرلار.عرب لری دارلارا آسیب تورک لری دوستاقلارا آتیب ،سنی دین آداملارینی،بهائی لری دوستاقلارا آ تیب ویا دولت ترور ایله اورتادان قالدیریرلار.

بو حادثه ده ن بیزیم آلمامیز گرکن درس لر اولدوغو دوشونجه سینده یم. آذربایجان میللی آزادلیق حرکاتیندا کی دیکتاتورلاشماک ایسته ین و اونلارا آلقیش توتانلار،اونلاری فدائی سی اولمایا حاضیر اولان لارین وار اولدوغونو بیلیریک. دیکتاتورلارین بیزی ده دیکتاتورلاشدیرماسینا ایزین وئرممه لی ییک، چونکو اونلارین بیزه و میللت یمیزه وئرجکلری تکجه هدیه اؤلوم،نیفرت،اینتقام وفلاکت اولاجاق.

اوچ بئش کیشی بیرآرایا گلیب بیرمیللت اوچون بایراق یاراتیب و اونو زورایله میللته تحمیل ائتدیرمیه چالیشانلار،چیچیک بیر تنقیده دوزه نمه یه ن، تنقیدچی لری دوشمان اعلان ائده ن ذهنیت لر، اگر فرصت تاپسالار صدام دان داها آجیماسیزبیر دیکتاتور اولاجاقلاری کسین دیر.

بو تاماح کار و آج گوزلو منتالیته(منطق) صاحیب لری حه له هئچ بیر گوجلری اولمادان بو قدر تک الجی(انحصار طلب) دیرلر ایسه ، کیشی لری،تشکیلاتلاری تانریلاشدیراراق اونلارین ائلئشدیریلمه سینی سوچ اعلان ائده یرلر ایسه ،کیچک بیر قدرت تاپسالار نه لر ائده جه کلری گونو کیمی آیدین دیر.

بو مانتالیته ایله بو گونو قورتارماق آدینا امکداشلیق ائده ن،بونلارین قارشیسندا وطن داشلیق،اینسانلیق گؤره ولرینی یئرینه گتیرمه ییره ک سوسانلارین عراق میللتینین باشینا گلن لری، آذربایجان میللتینه ده لایق گؤردوکلرینی دوشونوره م.

من یاشادیغیم توپراقلاردا یاشایان اینسانلارین،سئودییم باجی قارداشلاریمین،دوغاجاق اولان اوشاقلاریمیزین اؤنجه کی دیکتاتورلوق ایندی کی نده ن داها عادل،داها یاخشی یدی دئمه سینی ایسته میره م.

بو گون گونئی آذربایجان میللتینی فارس شووونیست لرینده ن قورتارماغا سویونانلارایلک اؤنجه اؤزلرینی اؤز روح لاری نین درینلیک لرینه قده ر یانی ایلیک لرینه قده ر ایشله ین، نفوذ ائده ن و روح لارینی ، دوشونجه لرینی اسیرآلان ایچلرینده کی بؤیومک ایسته یه ن کیچیک دیکتاتورلاردان قورتولمالی و سونرا میللتی قورتارماغا سویونمالی دیرلار.

اومود ائورن

ulashoz@yahoo.com