محمد بيريانين ايستينطاقنامهسى

دوقتور محمد علي فرزانه

من اؤلسم باخ بو اوراقه، تحسورله مني ياد ائت،
توپور چرخ جفاکاره،موعذب روحومو شاد ائت !

ايلک سطيردن اوخوجودا درين اورک آغريسي و جان گيزيلتيسي دوغوران بو "ايستينطاقنامه"،وقتيله (1320-1325 نجي ايللرده) ايران آذربايجانيندا آلوولو آنتي فاشيست شعرلرين وجوشغون ميلى- دموکراتيک دويغو و دوشونجهلرين قودرتلى جارچيسي اولان و سؤيلهديگي ايجتيماعى-اينقيلابى شعرلري ال به ال دولاشان محمد بيريانين آجيناجاقلي حياتيني قاورايان و طالعسيزياشامينين سونونا قدر دوام ائدن فاجيعهنين ماجراسي در.

شاعير،ايراندا ياشارکن، خوصوصيله يوخاريدا ايشاره ائتديگيميز ايللرده، هر يئرده سووت اتفاقينين و قيزيل اوردونون آمانسيز مودافعي کيمي تانينديغي و قيمتلنديريلديگي حالدا، 1946- جيايلده، ايران آذربايجانيندا باش وئرن حرکاتين دئوريلمهسيله اوتايا کئچديکدن سونرا چوخ اوزون سورمه،دن يئنيدن ايرانا قاييتماق فيکيري ايله آليشير و بئلهبير ايستهگه جان آتديغيي و آياق ديرهديگي خاطيره، مير جعفر باغيروف "عدالتيني "قورويان امنيت دايرهلري طرفيندن سووت قورولوشونا قارشي خيانته، يالانچيليغا، صميمييت سيزليگه، ايفشاچيليغا و بونلارلا بيرليکد هاجنبي جاسوسلوغونا تهمتلنهرک جزالانديريلير و جزالانديرما دؤنهدؤنه اوستهلنير.

ساعاتلار و گونلر تکرار ائديلن و بير چوخ حاللاردا يوروجو و بئزيکديريجي شکيلده امنيت مأمورلاري طرفيندن يئنيدن ايرلي سورولن بو ايستينطاقلارا او، تام شهامت و قطعييتله جواب وئريرو موستنطيقلرين ايتيهاملاري نئجه يوزدوقلارينا، اونلاردان هانسي نتيجهلري چيخارماغا چاليشديقلارينا باخماياراق، عئيني جوابي وئرمکدن و حاديثهنين نئجه باش وئرديگيني سؤيلهمکدن،اؤزونون ايشتيباهلاريني (خيانت و جاسوسلوغو يوخ )بوينونا آلماقدان چکينمير.ايستينطاقچيلارين تهديدلري و چاشديرمالاري اونو نه سارسيدير و نه قورخودور.او ايناملا و نتيجه هرنه اولورسا اولسون، دئديکلري اوستونده دايانيب و قالير.

بو دؤنهدؤنه تکرار ائديلن قويروقلو ايتيهاملار و اونلارين "ا يثباتي" ايچون دولانباج يول لار آرانديغي حالدا بيريانين بوتون پسيکولوژيک وارليغيني قاپسايان و باشيني ديک توتماقدا اونا معنوي گوج وئرن ديني مذهبي اينانج لاري، عاييله باغليليغي و اؤز يورد ـ يوواسينا دؤنمک علاقهسي (اورادا اونو گؤزلهين هر جور تهلوکهني نظرده آلماقلا) آز و اؤتري ده اولسون نظره آلينمير.اونون دوستاق ائديلديگي تاريخده (13 سپتامبر 1947)،((منزليندهکي املاکينين (اثاثين)سياههسي اونا گوره توتولماييب کي، شخصن اونا مخصوص املاک و قيمتلي اشيأ يوخدور)) گوزاريشي بئله اونو موحاکيمه ائدنلري دوشوندوروب اوتانديرمير.

بيز بورادا بيريايا 20ايل زندان و سورگون فلاکتي دوغوران ايتيهاملاري آچيقلامادان اول، شاعيرين پسيکولوژيک دورومونو جانلي فاکتلارلا گؤسترمگي يئرلي سانيريق.

1-،آذربايجان ادبياتچيسي يحيي شيدا بيريانين ايرانا قاييتديقدان سونرا شعرلريندن 360- جيايلده،تبريزده نشر ائتديگي "اورک سوزلري" مجموعهسىنين باشلانيشيندا، بئله چيخيش ائدير:

قئيد ائتمک يئرليدر کي: بيريانين 1320-1324 ايللرينده يازديغي شعرلري، همين ايللر، ايلک دفعه "اورک سوزلري" عونواني آلتيندا، محمد سعيد اوردوبادينين باش سؤزو ايله باکيدا نشرائديلميشدر.

"بيريا ايمانلي،مهريبان و اعتيقادلي شاعيرلردن ديرکي، حتا غوربت اؤلکه سينده ده اؤز ماهييتيني دگيشديرمهدي و بو ايش سبب اولدي کي، اويئرين ايدئولوژيسيندا تحليل اولماسين و ديگرشخصييتلر کيمي ماسک عوض ائتمه سين!"

2-،منيم ايللردن بري اوستونده ايشلهديگيم جنوبي آذربايجان شعري آرشيوينده بيريانين ترجومه حاليندا اونون ديني اينانج لاري باره ده بو سؤزلري اوخويوروق :

"بيريانين عؤمور بويو مذهبي اينانجلارا باغلي اولدوغونو، اونون ان کيچيک ياشلاريندان تا قوجايا شلارينا قدر، حتا اونون بير چوخ سياسي اينقيلابى مضمونلو شعرلرينده گؤرمک اولار:

من فطرتاً مبارز دؤوران يارانميشام،
يوخسوللارا اوميد و نيگهبان يارانميشام.

حقين يولوندا ناطيق قورآن علي کيمي،
اؤز قانيما زمانهده غلطان يارانميشام

3-،ميلى حؤکومت عرفه سينده و بيريانين ماعاريف وزيري اولدوغو سيرادا من شخصنً اونو تاسوعا گئجهسي تبريزده شمع پايلاياندا (مسجيدلرده شمع يانديراندا) گؤروب و گؤروشموشم. حتا اومني گؤرونجه دئدي : دئيهسن سن ده شمع پايليرسان؟ من دئديم: يوخ منيم نذريم يوخدو. سنين نذرين وارسا الله قبول ائلهسين! او، يوللاناندان سونرا بيرداها دؤنوب دئدي: سالدونها! بيردانا منيم طلبيم!

4ـ،همين ايللرده سيد احمد کسروي ديني،-،مذهبي اينانجلارا قارشي چيخديغيندا تبريزشاعيرلريندن نئچهلري اونو لعن ائتميشديلر. بو لعنتنامهلر ايچريسينده بيريانين يازديغي شعرهاميدان گوجلو ايدي.

5-،"ايستينطاق نامه"ده اولان سوآل - سورغولار عوموميتله بيرياني تؤهمتلنديرمک و قارالاماق مقصدي داشيديغي حالدا، اوردا ايکي شاهيدين بيريا حقنده يازديقلاري شهادت نامهلر ده يئرلشميشدير. بيريا دوققوز ايل زيندان شيکنجهلرينه قاتلاشاندان سونرا يازيلان بو شهادتنامهلرده شاعيرين کيمليگينه و اينانجلارينا ايشاره لر وار.

بيرينجي شهادتنامهني يازان ميررحيم ولائي (دموکرات فيرقهسينين مسول کادرلاريندان) بيريادان اولدوقجا ساغلام بير ترجومه حال وئرميشدر. ايستينطاق نامهده اوچ صفحهدن چوخ يئرتوتان بو صميمي شهادتنامهده بيريا حقينده هرشئي صداقتله و آچيق آيدينن گؤستريلميشدر.بوشهادتنامهده دئيلير:

"سيزين سوآللارينيزا جواب اولاراق بيلديريرم کي، باقرزاده بيريا دينه ايناناندير. تبريزده قالان عاييله سيني چوخ سئوير. آرواديني و اوغلونو ـ فائقي چوخ سئوير. اوغلونون 10 ياشي تمام اولور. بيرنئچه دفعه عاييله سيني باکييا گتيرمک ايستهميشدير. مومکون اولماديقدا اؤزو تبريزه گئتمگي آرزولاميشدير.»

ايستينطاقنامه"ده ايکي صحيفهده يئرلشن عباسعلي اوغلو، آذربايجان دمکرات فيرقهسينين عوضوو وسووت آذزبايجاني علملر آکادمياسي تاريخ اينستيتوتونون علمي امکداشينين شهادت نامه سيدير.بو شاهيد ده محمد بيرياني هميشه رهبر وظيفهلرده چاليشان، اؤزونو ناموسلو، قابليتلي، دؤزوملو رهبر و فعله موباريزهسينين گؤزهل تشکيلاتچيسي کيمي تانينميشدير...بيريانين چاتيشمايان جهتي اونون ديالکتيک ماترياليزمي پيس بيلمهسي، دينه اينانماسيدير. او عاييله سيني چوخ سئويرو هميشه بيلديريرکي، عاييله سيز اونون حياتي معناسيز دير. او عاييله سيني ده باکييا گتيرمکايستهدي. بو مومکون اولماديقدا يئنيدن تبريزه قاييتماق ايستهدي. سياسي فعاليتينه گؤره اوردا اونو آساجاقلاريندان بئله چکسينمهدي".

البته، تام گووهن و صداقتله يازيلميش بو شهادتنامهلر، فيرقه امکداشلاري و يئرلي مسوللارين تلاشلاري ايله بيريا ايلک زينداندان وقتيندن اؤنجه بوراخيليب باکييا گلير. اونون بوراخيليشينا امک صرف ائدنلر بونونلا کيفايتلنديکلري حالدا، بيريا يئنه ده ايرانا قاييتماغا اياق ديرهيير وبونونلا ايلگيلي آنلاشيلمازليقلار اونون يئنيدن زيندانا و تبعيده محکوم ائديلمهسيله نتيجهلنير وبئلهليکله ده بيريا 25 ايل اؤز دويغولارينين دوستاغي اولور. ثلاکين ايستينطاقنامهنين هاميدان ماراقلي وهاميدان بارماق قويولاسي يئري و دئمک اولار کي بوتون بيريا قضيهسىنين باشلانيش نوقطهسي (بو دور کى،) 1942 - جي ايلده تبريزده چيخان "آذربايجان" روزنامهسينده بوراخديقلاري اينقيلابى-دموکراتيک شعرلر و مقالهلر خاطيره گؤز آلتينا آلينيب توتولماق تهلوکه سينده اولدوقلاري گونلر قيزيل اوردونون گؤستريش و يارديمي ايله سووت آذربايجانينا -باکييا کؤچورولورلر. البته بوگئديشدن اول، بيريا عاييلهسي ايله ايللر بويو بير ايرانلي کيمي باکيدا اولموش، اوردا مکتبه گئتميش و عاييلهسيله ده ايرانا قاييتميشدير. بو گئديب گليشلرده هئج بير مساله يارانماميشدير. لاکين 1942- جي ايل سفرينده بيريا ايرانا قاييتماق اوچون اياق ديره يينجه ان.ک.و.د. ايلهاوز-اوزه گلير. بونلار بيريانين ايرانا قاييتماق علاقهسيني دويونجا اونا امکداشليق ايلتيزامي وئرمک مسالهسيني اورتايا آتيرلار و بو ايلتيزامي دا اونا يازديريرلار. آشاغيداکي ديالوق "ايستينطاق نامه" دن بو مساله ايله ايلگيليدير:

«سوآال: سيزينله «ان.ک.و.د.» امکداشلاري آراسيندا صؤحبت نهدن عيبارت ايدي؟

جواب: «ان.ک.و.د.» امکداشي قاباقجا منيم ايرانا قاييتماق نيتى مين سببلريايله ماراقلاندي. اؤز فيکيريمدن دؤنميهجگيمي گؤرندن سونرا«ان.ک.و.د.» اورقانلاريله امکداشليق ائدهجگيم باره ده ايلتيزام وئرمک مسالهسيني اورتاليغا آتدي. من ايران تبعهسي اولدوغومو باهانا ائديب، «ان.ک.و.د.»، اورقانلاري ايله امکداشليق باره ده ايلتيزام وئرمکدن بويون قاچيرديم. آنجاق ايرادهمين عکسينه اولاراق، منيمله صؤحبت آپاران «ان.ک.و.د.»امکداشىنين تأکيدي ايله امکداشليق حقينده ايلتيزام وئرديم.

سئوال: «ان.ک.و.د.» ارگانلارينا وئرديگينيز ايلتيزامين مضمونونو دانيشين.

جواب: همين ايلتيزام منيمله صحبت آپاران «ان.ک.و.د.» ارگاني امکداشينين ديکتهسيآلتيندا آذربايجان ديلينده عرب حروفاتي ايله شخصاً منيم طرفيمدن مضمونو بئله ايدي:

"من، باقرزاده محمد، غلام اوغلو، حاضرکي ايلتيزامي «ان.ک.و.د.» اورگانلارينا اونا گؤرهوئرديم کي، سووت اتفاقينين دوشمنلري ايله مبارزه آپارماغي عهدهمه گؤتوردوم. بوايلتيزامي پوزماق و يا اونو يايماغا گؤره مسئوليت داشييرام".

سئوال: ايستينطاغا معلوم دور کي، سيز همين ايلتيزامي يايميسينيز؟

جواب: بونو بوينوما آليرام کي، «ان.ک.و.د.» ارگانلارينا امکداشليق باره ده مندن زورلاآلينان ايلتيزام حقينده ايرانا گئتمگه اجازه آلديغيم زمان ايرانين باکيداکي سفيري زنده صحبتائلهميشم. من زنددن همين ايلتيزامين منيم و عاييلهمين ايرانا گئتمگه مانع اولوب-اولماماسي بارهده سوروشدوم. او بييلديردي کي، همين ايلتيزامين منيم ايرانا گئتمگه مانعاولماماسينا چاليشاجاق.

سئوال: باشقا سؤزله دئسک، سيز ايرانين باکيدا کي باش کنسولي واسطهسيلهاؤزونوزون «ان.ک.و.د.» ارگانلارينين گيزلي امکداشي اولدوغونوزو افشاء ائتميسينيز.

جواب: دوغرودور.

سئوال: سيزين همين ايلتيزامي زورلا وئرديگينز بارهده سؤزلرينيز غير صميمي دير. اگر ايلتيزام سيزين ايرادهنيزين ضدينه آلينميشسا، سيز يوکسک وظيفهلي سووت مامورلارينامراجعت ائده بيلردينيز.

جواب: من بو بارهده يوکسک وظيفهلي سووت ايشچيلرينه مراجعت ائتمگي درک ائتمهميشم. ايستينطاق 12 اوگوست 1948 -نجو ايلده ساعت 10-4 دقيقه کسيلدي. ايستينطاقي آپاردي: ايستينطاق شعبهسينين مديري پادارف.»

البته بو سئوال،-،جوابلار بير يا ايکي دفعهده سونا چاتميرث و هر دفعه آيري بيچيمده و اولکيندن داها کسگين و داها بوروشدوروق و کنايهلي سئواللاردا يئرلشديريلديکده، بيريا چکينمهدن ماجراني اونلارين ايستهديگي ساياق يوخ، بلکه اولدوغو ساياق بيان ائدير. بو سئوال -جوابلاردان نمونه اولاراق آشاغيداکيلار دقته لاييق دير:

«سئوال: سيز «ان.ک.و.د.» اورگانلاريله امکداشلييغا ايرادهنيز عليهينه جلب اولوندوغوز باره ده کي فکرين اوستونده دورورسونوزمو؟

جواب: بلي، فکريمين اوستونده دورورام. 1942- نجي ايلين نويابريندا «ان.ک.و.د.»اورگانلاري امکداشليق باره ده ايلتيزام مندن ارادم عليهينه، باشقا سؤزله، زورلا آلينيب. بو ايلتيزام حقينده ايرانين باکيداکي باش کنسولوسوندا معلومات وئرمگيمين ايکي سببي وار:

1- «ان.ک.و.د.» اورگانلاريله امکداشليق بارهده ايلتيزام مندن مجبوري آلينميشدي.

2- من ائله فکرلشيرديم کي، همين ايلتيزام منيم ايرانا قاييتماغيما مانع اولا بيلر.

سئوال: دوز دئميرسينيز. سيز بونونلا ساتقينليغينيزا بير نوع برائت قازانديرماقايستهييردينيز.

جواب: من دوز دئييرم. «ان.ک.و.د.» اورگانلارينا وئرديگيم ايلتيزامي آچيقلاديغيم ايچون گناهيمي آزالتماق فکرينده دئيلم.

سئوال: سيزين «ان.ک.و.د.» اورگانلاريله گؤنوللو امکداشليغينيز باره ده ايلتيزامينيز اؤزالينيزله، دوغما آنا ديلينده، عرب حروفاتي ايله يازيلميشدير.

ايندي ايسه سيز غير صميمي شکيلده بيلديريرسيز کي، ايلتيزام سيزدن مجبوري شکيلده،سيزين ايرادهنيزين عليهينه آلينميشدير.منطق هاردادير؟

جواب: «ان.ک.و.د.» اورگانلاريله امکداشليق حقينده "ناطق" لقبي ايله امضالانميش ايلتيزامي حقيقتاً من يازميشام، آنجاق فاميلياسيني بيلمهديگيم «ان.ک.و.د.» امکداشينين ديکتهسي ايله.»

ماراقلي بوراسيدير کي، بو ايلتيزام 1942-نجي ايلده آلينميشدير و بيريا همين ايلده ايرانا قاييتماق قصديله کنسولاتا مراجعت ائدنده اونو "افشا" ائتميش و بئلهليکله ده اولدوقجا آيدين دير کي، ايستر شوروي و ايسترسه ده ايران امنيت دايرهلري هم بو ايلتيزامين وئريلمهسيندن و هم ده اونون"افشا" ائديلمهسيندن خبردار ايميشلار. بونونلا بئله، بيريا ايرانا قاييداندان سونرا سياسي-ايجتيماعى فعاليتلرينه، همده ان يوکسک مقاملاردا دوام ائتديرير و کيمسه اونون گؤزونو ده پوفلهمير. لاکن او 1948-ده ايکينجي دفعه ايرانا قاييتماغا آياق ديرهديکده بو "ايلتيزام" و اونون "افشا" ائديلمهسي بير خيانت و جنايت کيمي اونون بوينونا يوکلنير و بونون سيراسيندا يئني "ايتيهاملاردا"عنوان ائديلير.

ايران و شوروي حؤکومت و امنيت مأمورلاري گؤزو اؤنونده! اؤنجه ايرانا قاييتماق اوچون ايران سفارتينه گئتمک و اونون آردينجا «ان.ک.و.د.»ايله امکداشليق حقينده زورلا يازيليب امضالانميش ايلتيزامي افشا ائتمک ايتيهامي ياپيلديقدان سونرا بونلارلا ياناشي آمريکا کونسولي ومطبوعاتچييلاري ايله مصاحبه آپارماق دا بير جاسوسلوق ايتيهامي کيمي اورتايا قويولور.

ايستينطاقلاردان اؤيرهنيلديگينه اساساً بيريانين ميلى حؤکومت ايش باشيندا اولدوغو سيرادا آمريکانين تبريزده کي کونسوللاري وهابئله آمريکا مطبوعات مخبرلريله مصاحبهلري اولور. بو مصاحبهلر "ايستينطاق"دا آشاغيداکي بيچيمده عنوان ائديلير:

«سئوال: ايران آذربايجانيندا دموکراتيک حکومتي زمانيندا سيز تبريز شهرينده آمريکا کونسولو ايله گؤروشموسونوزمو؟

جواب: بلي، بيرينجي آمريکا کونسولو کاندئرسونو اؤز کابينتيمده (دفتريمده) ايران آذربايجانيندا دموکراتيک حکومتين ماعاريف ناظري اولدوغوم زمان قبول ائتميشم. کاندئرسون يانيما تبريز شهرينين ساکيني اولان ترجومهچييسي آصفله گلميشدي. همين قبولدا دموکراتيک حکومتىنين تکجه نمايندهسي من ايديم. آمريکا کونسولو ايله ايکينجي گؤروشوم 10-9 آيدان سونرا اولدي. او واختلار من آرتيق ايران آذربايجانينين همکارلار اتفاقينين صدري ايشلهييرديم. او واخت آرتيق آمريکا کونسولو مستر ستتون ساتئن ايدي.

همين گوروش منيم ايش اوتاغيمدا اونون ترجومهچيسي آصفين اشتراکي ايله کئچدي. ماعاريف ناظري اولدوغوم زمان يانيما ايکي آمريکا ژورناليستي (آدلاريني بيلمه ديگيم ملييتجه ائرمني اولان ترجومهچيلري ايله) گلميشدي. همين ايکي گؤروشدن علاوه، من ايران آذربايجانينين حؤکومت عضولرينين سيراسيندا آمريکا کونسوللوغوندا قوناقليقدا اولموشام.»

بو جوابين آردينجا "ايستينطاق" بئله بير سئوال اورتايا قويور:

«سئوال: سيز آمريکا کونسولو و ژورناليستي ايله نهباره ده دانيشميسينيز؟

بو سورغونون جوابيندا بيريا مفصل حالدا بيرينجي کونسولون آذربايجان دموکراتيک حکومتي ايشلريله ماراقلانديغي و بونونلا علاقهدار نئچه گون اول ايران آذربايجاني دموکراتيک حکومتىنين باش ناظري پيشهوري ايله گؤروشو و حکومتين باشقا ناظرلريله تانيش اولماق آرزوسوندا اولدوغونو قئيد ائدير...»

(بيريانين بو سورغويا وئرديگي جواب مفصل اولدوغوندان بورادا نقل ائديلمير..اونو بو باشلانيشلا بيرليکده اوخوماق ايستهينلر 60-56 صفحهلرده گؤره بيلرلر). بو باشي ايراندا وقويروغو شورويده اولان سوروشکن ايتيهاملار، تهمتلنديريلندن چوخ، تهمت ووراني افشا ائدير. اؤزلريني ايران آذربايجانيندا باش وئرن حرکاتا وصي-قييوم قرار وئرن و اونون ايشلرينه قاريشماقدا اؤزلرينه حق قازانديرانلار بيرگون مير جعفر باغيروفون موحاکيمه سينده آذربايجان دموکرات فيرقهسي و پيشهورينين شبههلي اؤلومو بارهده شاهدلرين شهادتلري دينله نيرکن مسکودان گلن مدعي العموم بومسالهلرين خارجي ايشلره عايد اولدوغو، شورااتفاقينين داخلي ايشلرينه داخل اولماديغي عنوانيله بو شهادتلرين أؤنونو آلير. لاکين بير آيري يئرده محمد بيريانين ايران آذربايجانيندا و ميلى حؤکومت ايشلري چرچيوهسينده بير مسول مقام کيمي اصلاحي نظرلريني فلان ديپلومات يا ژورناليسته سؤيلهمگي جاسوسلوق ايتيهامي ايله نتيجه لنير.

اينديکي کيمي ياديمدادير. او گونلر تبريز اونيوئرسيتهسىنين آچيليشيندا فرانسه کونسولو دا اوردا ايدي. اونون گؤزو ميلى حکومتين اوردو و فدائي باشچي لاريندان جعفر کاويان و غلام دانيشيانا ساتاشينجا، مترجمي ايله اونلارا ياناشيب و تعارفاتدان سونرا اونلارلا بير ديالوق آپارماق آرزوسوندا اولدوغونو بيلديردي. اونلار بو ايستهگي رد ائتمهديلر. آمما، اونلار هر ايکيسي بوتون ايللر بويو شورويده اولدوقلاري زمان بو مصاحبهدن ساري ايستينطاق ائديلمهديلر و اجنبي جاسولوغو ايله تهمت لنديريلمه ديلر.

اسلامي انقلاب باش وئرندن سونرا، بيريا ايللر بويو بوتون حياتيندا جان آتديغي دوغما شهري تبريزه قاييتماق آرزوسونا نائل اولدو. لاکين اوتوز ايلدن چوخ آجي دربدرليکلر و اوغورسوز ديدرگينليکلر چکن شاعير، اؤز آرزوسوندان بارينمادي. اونون نه عاييله اوجاغي و نه دوغما خلقي ايچون بسلهديگي عؤمور رؤيالاري يوزولمادي. شاعيرين عليهينه آپاريلان هرطرفلي شانتاژلار وچامير سپمهلر، اونون اسلامي اينانجلاريندان و دوغما يوردونا قاييتماغا جان آتديغيندان ساري چکديگي بوتون آجيناجاقلاري و آلچالديلمالاري حسابا آلينمادي. اونون سينيق و کؤورهک اورهيينه بير محبت و همدردليک مرهمي قويولمادي. حتا اونو تبريزده جمعه نامازينا يول وئرمهديلر. بلکه ده اونون مزاري بئله ايتگين قالدي...