ذولفقار کمالی

 

 

بهمنين ايگيرمی دوققوزو

 

دئديلر بير گؤر تبريزی

کؤينک گئيميشدی قيرميزی

آذربايجانيمين گؤزی

ظولمدن قورتارسين بيزی

بهمنين ييرمی دوققوزو   

 

شنبه گونو سحرچاغی

ائل اله آلدی چوماغی

تيتره‌دی قورخودان ياغی

گؤرن تک بره‌لدی گؤزو

بهمنين ييرمی دوققوزو

 

دئديلر گلدی ستارخان

نظميه چکدی الآمان

لچک اؤتموشدو پاسيبان

دؤولتين عورضه‌سيز قيزی

بهمنين ييرمی دوققوزو

 

دئديلر يالاندی يالان

خارجه‌لی دئييل اينان

تبريزلی ايدی کی قويدو جان

وطن اوغروندا اؤزی

بهمنين ييرمی دوققوزو

 

جام سينديران غولامعلی

اوروجعلی ايله پنجه علی

هاردان اولدو خاريجه‌لی؟

تبريزلی اؤزويدی اؤزو

بهمنين ييرمی دوققوزو

 

دئيين ياتانلار اويانا

ظولم اليندن گلديک جانا

ظولمو بوياديق قانا

قوی هامی بيلسين بو سؤزو

بهمنين ييرمی دوققوزو

 

گوله سسی گورولدادی

دئولر کيمی نريلده‌دی

ميلت باخيب گولومسه‌دی

ديش قيجيرتدی قوردا قوزو

بهمنين ييرمی دوققوزو

 

دايانما دوغرولدو زامان

ظاليمه وئرمه‌يين آمان

خايينه ولوله سالان

بو خالقيمين اورک سؤزو

بهمنين ييرمی دوققوزو