عزیزینم بیرده سن ...

نگار خياوی

سن

تورکجه نین قاوغالی باشی

سن هئی ی ی... دونیانین دوغما قارداشی

باش گؤتوروب هارا گئدیرسن بئله دیک دیک

هارانی تانیرسان اؤزوندن باشقا

باش آچمیش باهارینی کیم باشارار

کیم ائده بیلر اونا ییه لیک

شیرین دیللیم!

هانسی سئوگیلی گؤروشه چاغیرمیش سنی

یوخسا

باشقا یئرده اؤزونه محتاج گؤرورسن وطنی

بالام هئی ی ی ... هارا گئدیرسن؟

قیویریق روحونون آلتینا  آلیب ائللری، دیللندیریرسن

آخی سن، آخی سن... آی گولوم

سنین آخشاملارین دیر...

بوراسی سنین آلانلارین دیر...

من عاشیق...

نئچه بوداق یول اولورسان،

نئچه یول یوللانیرسان

یئنه باشقا میدانمی اوخورسان؟

نئچه میدان، نئچه میدان اوخونورسان

بونجا میدانلاری، اؤزونه نئجه اوخوتدورورسان

بوزقیرلیغا قاپی آسان سن

کیمسه سیزلیک چاتلاغینا بایاتی بایاتی اسیلان سن

بو آج قارین خیاوانلارا،

عزیزینم... بو آج قارین خیاوانلارا

تورکجه نی دیمدیکله ین سن

آنا دیلیندن بیر قارین

بیرجه قارین دوغماغا یئریکله ین، سن

عزیزینم بیرده سن...

یئری یئری ایپ توخو

ایپک تئلدن ایپ توخو

قوی بوینوما آسیلسین

یار کامانی، یار اوخو

سنی سندن باشقا کیم باشارار

دونیانین دوغما قارداشی

تورکجه میزین قاوقالی باشی... !