اسماعيل جميلی نين شعرلريندن   

 

    آذربایجان

 

قالخ ایاغا  گؤستر یئنه  قدرتینی آذربایجان

آلقیشلاسین قوجا تاریخ غیرتینی  آذربایجان

 

ال بیر اولوب اییدلرین   باغیرمالی     بسدیر تالان

سؤز بیر اولوب آیدینلارین سویله مه لی یئتر یالان

وارلیغینی    یوخ سایانلار        اهانتی ائدیر عیان

چیر ما قولون ساخلا اؤزون حورمتینی آذربایجان

قالخ ایاغا   گؤستر یئنه       قدرتینی   آذربایجان

 

سن اؤزگه دن اوموب کوسمه سن سن اولسان سنه یئتر

اوغلانلارین قوخماز ستار  هر بیر قیزین قوچاق هجر

حق سنله دیر   حقّین گوجو     ظالیملری    کسر بیچر

حق یولوندا   حقه  تاپشیر   ملتینی  آذربایجان

قالخ ایاغا   گؤستر یئنه   قدرتینی  آذربایجان

 

ساتقین یوباز قوللوقچولار وارلیغینی سایا سالماز

ائولادینی  انسان بیلمز  بیلسه دیلین  باغلی قالماز

گوندن گونه یاد الینده جنّت یوردون  تالان اولماز

قیر زنجیری   آزاد ائله    تربتینی  آذربایجان

قالخ ایاغا    گؤستر یئنه   قدرتینی  آذربایجان

 

سن دؤزدوکجه دیلی اوزون یاد اوزله نیر لاپ قودورور

گؤز اؤنونده   حقلرینی   بیر بیر دانیر    قارشی دورور

دوز سؤزونو   بوغازیندا   بوغور  حقّی   ترسه یورور

 گیرمیدانا    گئری قایتار  غزتینی   آذربایجان

قالخ ایاغا   گؤستر یئنه   قدرتینی    آذربایجان

 

اؤز دردینین چاره سین قیل  اؤز غمینین  دردینه یان

بسدیر  اؤزگه اوجاغیندا یانیب کول اولدوغون اویان

آپارتایدین یئخ زندانین  آزاد ائللر     وئرسین فرمان

دینله  ده ده قورقودونون   صحبتینی  آذربایجان

قالخ ایاغا   گؤستر یئنه    قدرتینی    آذربایجان

 

دیلی باغلی قولو باغلی  تورک ائلیمین  اوجاغیسان

گله جه گین    دوغرو یولو   آیدینلیغین  چراغیسان

بابکلرین   دریوشدویو  قورتولوشون   بایراغیسان

اؤزون قورو  ملتینی    دولتینی   آذر بایجان

قالخ ایاغا  گؤستر یئنه   قدرتینی  آذربایجان

                                                                    

 

        

 

    قهرمان تبریز

 

یاشاسین یاشاسین  قهرمان تبریز

ستارخان  غیرتلی  دایانان تبریز

 

آرزو دیارینین    اومود قایناغی

ائلینین سؤنمه ین  یانار اوجاغی

آذادلیق یولونون  شانلی بایراغی

ائلینین  اوزونو     آغاردان تبریز

یاشاسین یاشاسین  قهرمان تبریز

 

قوینوندا یاشاییر      مینلر بابکی

سینمایان سنگردیر یارالی ارکی

قورتولوش ظفری  آرزی دیلگی

ساتقین مانقوتلاری قورخودان تبریز

یاشاسین یاشاسین       قهرمان تبریز

 

حقیرلر قودوروب ائدیر حقارت

زنجیرده اسلانا    ائدیر جسارت

قانماییر قورتولسا   قوپار قیامت

ستارخان باغیرخان باغبان تبریز

یاشاسین یاشاسین قهرمان  تبریز

 

فریلداق مرکزه    بیرده اینانماز

حقّین آلمایینجا  ساکیت اولانماز

ترک ائلیم سویونو دیلینی دانماز

ائلینین یوردونون باغری قان تبریز

یاشاسین یاشاسین    قهرمان تبریز

 

دوشمه نین گیزله نن مین بیر اوزو وار

به زه نمیش یالانلا  سایسیز سؤزو وار

سئوگیلی یوردومدا    مردار گؤزو وار

یئنیلمز ائولادی      اویانان تبریز

یاشاسین یاشاسین  قهرمان تبریز

 

قیزیلدان اولسادا        قفس زینداندی

ظولمه قارشی حقلی اولان عصیانلی

شووونیزمین  قانلی الی       عیاندی

تاریخی  یئنیدن      یارادان تبریز

یاشاسین یاشاسین  قهرمان تبریز

 

اردبیل      اورمیه    ماکی      کلیبر

مرند    سویوق بولاغ    نقده     اهر

بوتون آذربایجان جوشور سر به سر

ائلینه گووه نیب      دایانان تبریز

یاشاسین یاشاسین قهرمان  تبریز             

 

 

اونودولماز شهیدلر

 

ساوالان سهندین  یانار کؤکسونده       ( جاواد عابیدینی و بوتون قورتولوش شهیدلرینه اتحاف )

گونشه اوز توتان  قیزیل  لاله لر

قانلی بایراغیدیر هر بیر شهیدین

قورتولوش یولوندا اوجالیب اسر

 

قارانلیق گئجه لر    آخان اولدوزلار

آیدین سحرلرین      یولون آچیرلار

یانارکن ظولمه تین  دؤشونو دئشیب

وورغون کؤنوللره ایشیق سا چیرلار

 

شرفلی یاشاییب      شرفلی  کؤچن

وطنین  آناسین      سئون عاشیقدیر

یاساق دیلین بایراق  ائدیب یوروین

آزادلیق  یولونو    گئدن عا شیقدیر

 

ظولمه باش ایمه ین   حقین جارچیسی

 سارسیلمایان اییدلره    عشق اولسون

آذربایجان    اوره گیندن        سیلینمز

اونودولماز شهیدلره     عشق اولسون

                                                                 

 

 

گله جک بیزیمله دیر

 

باشیمیز اوجادیر        آننیمیز آچیق

گونده دون دییشن قورخاق اوتانسین

ائلیمیز  دیلیمیز       سئوگیلیمیزدیر

یادلارا ساتیلمیش   یالتاق  اوتانسین

 

گون گون اورتا     حقیقتی دانانلار

گونشین اؤنونده   دووار هورورلر

قودوران قارا گون قیسیر قودوزلار

کوف قاپسایان یالانلاری حورورلر

 

آرینیب دورولوب    اؤزلوگون بیلن

ایشیق عاشیقلری      یورولمازدیلار

چوروک آپارتایدین کؤکون تیتره دن

سولماز باهاردیلار   پوزولمازدیلار

 

باطیلین باسقیسی    باتیرماز حقی

گله جک بیزیمله  حق بیزیمله دیر

قورتولوش یازینین یاییلیر عطری

ظفر تورک ائلیمله  تبریزیمله دیر                اسماعیل جمیلی