اولدوزلارین یوروشو

یئنیلیگین گؤروشودور

سئودامیزین اوفوقونده بویلانان

شفقده گونشیمیزین قانلی اؤپوشودور

قودورقان قارانلیغا ایز سالان

اولدوزلارین یوروشودور

گئجه نین دؤشونه سانجیلان

قهرمانلیق اوجاغیندا

اوجا داغلار قوجاغیندا

زیروه لره داشییرلار آرزیمیزی

کؤنول کؤنول قورویورلار یازیمیزی

آیدینلیق قوشلاری قیزلار اوغلانلار

سؤنمز ایشیقلار

نغمه قانادیندا یاشادیرلار

دوستاق ائلی

یاساق دیلی

سازلی سؤزلو آشیقلار

اؤزگورلوگون ایستگیدیر

ائل گوجویله سئلله نیر

قورتولوشون دیلگیدیر

باخیش باخیش گول له نیر

چاغیر گلسین قارانقوشلار

قایالارین بئشیگینده

آذربایجان کئشیگینده

آغ قارانین دؤیوشو وار

اولدوزلارین یوروشو وار

ایگیتلرین گؤروشو وار

ایپک بولودلار بوینوندا

سیلدریم داغلار قوینوندا

قوجا قارتال یوواسیندا

اولو بابک قالاسیندا

اسماعیل جمیلی