بیزیم باهار

قاپی دؤیور یئنه باهار

قوجاق دولو چیچک ایلن

سئوه نلره مژده سی وار

سئوگی دولو اورگ ایلن

آستا اسن ایلیق یئللر

باغدان ایستیر موشتولوغون

یوللارینا سو چیله ییر

پوهره وئرن تومورجوغون

یازین گوللو گلیشیله

قیشا قالیر اوز قارالیق

قوووشورو گول بولبوله

آینا بولاغ اولور تانیق

قارا قیش تک قارا گونلر

یوخا چیخمیر ائلده ندن؟

یاد ائللرین جایناغیندا

اسیر اسیر دوغما وطن

یوزلر باهار گلیب کئچدی

اوزو گولدو طبیعتین

یالنیز فصلی دگیشمه دی

دردین غمین مصیبتین

بابک لرین آنا یوردو

یاد اللرد ه تالان اولدو

فضولونون شهریارین

گول باغچاسی یازدا سولدو

دیلی یاساق ائلی دوستاق

یاشیل یوردون گؤزو آغلار

قارا باغدان قارا داغا

وطن دردی کؤنول داغلار

آلیب سازین سونا بولبول

دئییر یئلما وورغون اورک

یئنی گونلر گتیره جک

ساوالاندان اسن کولک

بیزیمکیدیر گلن گونلر

باخ اوخویور قارانقوشلار

اؤزگورلوگون بایرامیندا

بیزیم باغدا گوله دولار

بوغانمادی قارا قیشدا

قار چیچگین شاختا بوران

او یاشاددی یاز اومودون

گونلوک غمه توتولمادان

آزادلیغین گوللو یازین

گؤزو یولدا گؤزلور دیار

یوبانسادا گلمه ده دیر

گول چیچکلی بیزیم باهار

اسماعیل جمیلی