آذربایجان فدرال دموکرات حرکاتی نین

آذربایجانین سیاسی- عقیدتی محبوسلاریلا ایلگیلی

بیلدیریشی

 

 

 وئریلن خبرلر اساسیندا بو ایلین دی آیى‌نين 11 -ده آذربایجان میللی حقلرینین مودافیعه چيلريندن 14 نفرينى، خانیملار و بگلر: پینار فرج زاده، زهرا فرج زاده، یوروش مهرعلی بیگلو، لطیف حسنی، آیدین خواجه ای، بهبود قلیزاده، بهمن نصیرزاده، علیرضا عبداللهی، حسن رحیمی، شهرام رادمهر، نعیم احمدی، محمود فضلی، شکرالله قهرمانی، اکبر آزاد، ، یونس سلیمانی و یاشار کریمی تبریزين اینقیلاب محکمه سينده موحاکیمه ائده‌جکلر.

 

بگلردن، یوروش مهرعلی بیگلو و لطیف حسنی 1389-جو ایلين اوردیبهيشت آیيندان بوگونه‌دک اینفیرادی سلول‌لاردا ساخلانيليب، آغیر جیسمی و روحی ايشکنجه لره معروض قالمیشلار.

 

بو ایلین دی آیی‌نین 11-ده محکمه لری اولان باشقا خانیملار و بگلر نئچه آی اینفیرادی سلوللاردا حبسده قالدیقدان و آغیر ایشکنجه گؤردوکدن  سونرا آغير وثیقه لر قارشیسیندا گئچیجی اولاراق دوستاقدان بوراخيليبلارلار.

 

بو اينسانلارين گئرچک سوچلارى تورک کيمليکلريندن مودافيعه ائتمه لرى و آذربایجان تورکلری نین میللی حقلری اوغروندا مدنی و تماميله موسالیمت ايله (دينج، باريشجيل) موباریزه ائتمه‌لرى دير!

 

بو احتیمال واردیر کی، تبریز اینقیلاب محکمه‌سى  بو میللی حقلرين مودافیعه چيلرينى اوزون حبسلره محکوم ائتسین. اونوتمامالی ییق کی ایسلام جومهوری سینین ظالیم محکمه سی عئینی ایتتیهاملار اوچون سعید متین پور و 8 ایل زیندانا محکوم ائتمیشدیر.

 

میللی کیملیگی و میللی حقلری ساوونماق اینسان حقلری نین آیریلماز پارچالارینداندیر. تحقیر و آيرى سئچيجيليگ ایله موخالیفت ائتمک و اونلارا قارشی دورماق تحقیر اولونموش اینسانلارین طبیعی و دوغال حقی دیر.

 

دوغرو دموکرات و آزادلیق سئور اینسانلار و اینسان حقلری نین اولوسلارآراسی بیانییه سینه اینانانلار عملده  مظلوملاردان و ظولم آلتیندا اولان اینسانلارین حقيندن مودافیعه ائتمه لی، تحقیر و تبعیضلر علئیهینهه موباریزه آپارمالیدیرلار.

 

 

تأسوفله اصلينده فارس دیللی و فارس مرکزلى اولان، اوزدن ايراق سرتاسرى تشکيلاتلار، درنکلر و مئديالار میللی بؤلگه لرین چتینلیکلرینه و مساله لرینه اعتیناسیز قالماقلا برابر بيله‌رکدن میللی بؤلگه لرده گئچن مساله لری سانسور ائدیرلر! بو دا میللی بؤلگه لرین  قورولوشلارى ايله فارس ديللى قورولوشلارین آراسینداکی امکداشليق و تفاهوم ياراتمانى انگلله‌ین جیددی عامیللردن بيريدیر.

 

آ.ف.د.ح. بوتون سیاسی قورولوشلاری و اینسان حقلری قوروملارینی آذربایجان تورکلرینین  توتوخلانمالارینا اعتراض ائتمگه چاغیریر.

 

آ.ف.د.ح. خاریجده یاشایان آذربایجانلی و غئیری آذربایجانلی تشکيلاتلاردان، درنکلردن و شخصیتلردن طلب ائدیر کی یاشادیقلاری يئرلرين سياسى پارتيالارينا، قورولوشلارينا و اینسان حقلری اورقانلارینا باش ووروب و اونلاری يانوار آیی‌نین بیرینده تبریزين اینقیلاب محکمه‌سينده آذربایجانين میللی حقلرینی مودافیعه ائدنلرین موحاکيمه‌سیندن خبردار ائتسینلر. آذربایجانلی محبوسلارین درحال ،قئیدسیز و شرطسیز آزادلیغا بوراخیلماسى اوچون، اونلاردان بوتون ايمکانلاريله ایسلام جومهوریسینه باسقی یاپمالارينی ايسته‌سينلر.

 

آ.ف.د.ح. اؤز نؤوبه سینده بوتون ایمکانلاریندان و اولوسلارآراسی رابیطه لریندن ایستیفاده ائده‌رک چئشيتلى پارتيالارا، امنستی اینترنشنالا و اوروپا پارلیمانینا موراجیعه ائدیب و اونلاری يانوار آيى‌نين بيرينده 14 نفر آذربایجانلی تورکون تبریز اینقیلاب محکمه‌‌سينده موحاکيمه اولونماسیندان خبردار ائدیبدير و اونلاردان ایسته‌میشدیر، آذربایجان سیاسی محبوسلارینين فئییدسیز، شرطسیز و درحال آزاد ائديلمه‌سى اوچون،اؤزلری بگنديکلرى کیمی ایسلام جومهوریسینه فیشار گتیرسينلر

 

 

آذربایجان فدرال دمکرات حرکاتی‌نين ایجرائیه هیاتی

 2010 جو ايلين دکابر آيى