بایراق حاقیندا گئدن موباحیثه لره سون قویماق لازیمدیر!

 

 

 

سون زامانلاردا گونئى آذربايجان  اينتئرنت سايتلاريندا، آذربایجان خالقینا و ایراندا یاشایان تورک میلتینه میلی سیمگه و میلی بایراق یاراتماق حقينده چوخلو يازى و تکليفلرگؤزه چارپير. بونلارين بيرپاراسى معلوم و بير چوخوسو نامعلوم ايمضالارآلتيندا وئريلميشدير.

 

بوگون آذربایجان خالقی مدنی، سیاسی و اقتصادی باخیمدان آغیر و چتين شرايط آلتيندا ياشاماقدادير. میلی آکتویستلريميز، آپارتاید رژیمى طرفیندن گوندن گونه شیدتله نن باسقى يا، زیندانا، ایشکنجه يه و حتی اؤلومه معروض قاليرلار. بئله بير وضعيتده، میلتیمیزین ميلی دمکراتیک حرکاتی معین چاتيشمازليقلاردان و او جومله دن تشکيلاتى ضعفلردن و تجروبه دن چتينليک چکن بير زاماندا، بايراق ياراتماق موباحيثه سينى مئيدانا آتماق، هر هانکی بیر شخص و قوروم طرفیندن اولسا دا، حقیقتن يئرسيز، گونوموزون واقعيتلرينه دايانمايان و انحرافى جهتده اولان بير ايشدير!

 

بوگون آذربایجان خالقی نین دوشمن لری، و اونون باشیندا ایران ایسلام جمهوریتی، چالیشیرلار کی آذربایجان آکتویستلرينين باشينى ضرورتی اولمایان  مسئله لرله قاتيسينلار، آذربایجان فعال لارینین انرژی سینى لازیم اولمایان يوللاردا هده ره وئرسينلر و اونلارين صفلرينى پارچالاسينلار. 

 

آذربایجان فدرال دموکرات حرکاتی، آذربایجان خالقی نین و تورک میلتی نین ميلی بایراق حاقینا مالیک اولماسینا ایناناراق، بوگونکو گرگين موباحیثه نی آذربایجانین میلی دموکراتیک حرکاتی نین ایستقامتینده گؤرمور. میلی بایراغین قراری، حوقوقی باخیمدان، سیاسی قوروملار و یا سیاسی شخصلرین طرفیندن دئييل، یالنیز گونئی آذربایجانین میلی مجلیسینده آلینمالی دیر.

 

آذربایجان فدرال دموکرات حرکاتی

2008-08-12